राधा क्यान्सर सचेतना फाउण्डेशनले ‘क्यान्सर सचेतना तथा हिंसाविरुद्धको पत्रकारिता पुरस्कार’ प्रदान गर्ने

काठमाडौं । राधा क्यान्सर सचेतना फाउण्डेशनले क्यान्सरका बारेमा चेतना जगाउन र महिला हिंसा विरुद्ध आवाज उठाउन प्रेरित गर्न पत्रकारिता पुरस्कार प्रदान गर्ने भएको छ ।

फाउण्डेशनका अध्यक्ष एवं पत्रकार प्रकाश बस्यालले २ लाख राशीको राधा स्मृति अक्षयकोष स्थापना गरिएको जानकारी दिदै हरेक वर्ष २० हजार रुपैयाँको ‘राधा क्यान्सर सचेतना तथा हिंसाविरुद्धको पत्रकारिता पुरस्कार’ वितरण गरिने घोषणा गर्नुभयो ।

कावासोतीमा आयाेजित फाउण्डेशनकाे कार्यक्रममा अध्यक्ष बस्यालले हरेक वर्ष फागुन ९ अर्थात् स्वर्गिय पत्रकार राधा बस्यालको जन्म जयन्तीको दिन नवलपुरबाटै ‘राधा क्यान्सर सचेतना तथा हिंसाविरुद्धको पत्रकारिता पुरस्कार’  वितरण गरिने जानकारी दिनुभयो । 

पुरस्कारका लागि हरेक वर्षको माघ ४ गते अर्थात आजकै दिन आवेदन आव्हान गरिने र  यो बर्षका लागि आजबाट आवेदन आव्हान गरिएको फाउण्डेशनले जनाएको छ । 

देशैभरका पत्रकारले यस वर्षको वैशाखदेखि पुस मसान्तसम्म प्रकाशन/प्रशारण गरेका क्यान्सर सचेतना र हिंसाविरुद्धका ३,क्यान्सर सम्बन्धी  एक लेख तथा समाचार फागुन ४ गतेभित्र फाउन्डेशनको इमेलमा पठाउन सकिने जनाइएकाे छ । 

‘१० वर्षदेखि सक्रिय पत्रकारितामा रहनुभएकी बस्याल विवाह पश्चात घरेलु हिंसाको शिकार हुनुप¥यो तर पनि निरन्तर हिंसाका विरुद्धमा र न्यायको पक्षमा लडिरहनुभयो फाउण्डेशनका अध्यक्ष बस्यालले भन्नुभयो,‘रोग र हिंसाबाट शिकार हुँदा पनि बस्यालको पत्रकारिताको यात्रा रोक्नुभएन , बरु त्यस कठिन घडीमा पनि महिला हिंसाविरुद्ध र स्तन क्यान्सरबारेको सचेतना जगाउँदै गाउँ गाउँ र बस्तीहरुमा पुग्नुभयो ।’ 

क्यान्सर रोगबाट पीडित पत्रकार राधाको २०७७ कात्तिक १४ गते  निधन भएको थियो ।