भारतबाट कोरोना खोप निर्यात बन्द, नेपालले किनेको १० लाख डोज के हुन्छ?
काठमाडौं । भारतले आफ्नो देशमा उत्पादित कोरोना विरुद्धको खोप निर्यात तत्काललाई रोक्ने भएको छ । कोरोना संक्रमण बढ्न थालेपछि भारतले अक्सफोर्ड–एस्ट्राजेनेकाको कोभिशिल्ड खोप अन्य देशलाई नदिने निर्णय गरेको भारतीय विदेश मन्त्रालय स्रोतलाई उद्रत गर्दै बीबीसीले जनाएको छ । यद्यपी कोभिशिल्ड उत्पादन गर्ने सेरम इन्स्टिच्यूटले यसबारे केही बोलेको छैन ।
मन्त्रालयका अनुसार संक्रमण बढेसँगै आफ्नै देशमा खोपको माग बढ्नसक्ने भएकाले निर्यात नगर्ने निर्णय भएको हो । भारतले अप्रिलको अन्त्यसम्म निर्यात नगर्ने जनाइएको छ । भारतको यो निर्णयले कोभ्याक्सको योजना अनुसार खोप वितरणमा असर पुग्नेछ । करिव १९० वटा देशमा कोभिशिल्ड नपुग्ने देखिएको छ ।
अहिलेसम्म भारतले ७६ देशमा ६ करोड मात्रा खोप दिइसकेको छ । बुधबार ४७ हजार नयाँ संक्रमित देखि भने २७५ जनाको मृत्यु भयो ।
भारतले निर्यातमा रोक लगाएसँगै नेपालमा पनि यसको प्रभाव पर्ने देखिएको छ । सिरम इन्स्ट्च्यिूटसँग खोप किन्न ८० प्रतिशत रकम पठाइसकेको भएपनि आउन बाँकी १० लाख मात्रा खोप समयमा नै उपलव्ध गराउन नसक्ने जवाफ दिएको बताइएको छ ।
तर स्वास्थ्यमन्त्री हृदयेश त्रिपाठीले भारतले जे निर्णय गरेपनि नेपालमा खोप आउने दाबी गर्नुहुन्छ । हेल्थपाटीसँगको कुराकानीमा उहाँले आफुहरुले चाँडै खोप ल्याउन पहल गरिरहेको र छिट्टै नै खोप आउने बताउनुभयो ।
बाल स्वास्थ्य तथा खोप शाखा प्रमुख डा. झलक शर्मा गौतमले नेपालमा खोप अभियान चल्दा १८ लाख व्यक्तिले पहिलो मात्रा लगाएको जानकारी दिनुभयो । तर ५ लाख खोप मात्रै मौज्दात रहेको उहाँले बताउनुभयो । मौज्दात खोप अनुसार स्वास्थ्यकर्मीलाई मात्रै दोस्रो मात्रा पुग्ने देखिएको छ ।
तपाईँको अभिमत