आधारभूत अस्पतालका लागि डाक्टर, नर्ससहित कर्मचारीको दरबन्दी तोकियो
स्वास्थ्य तथा जनसंख्या मन्त्रालयले स्थानीय तहले सञ्चालन गर्ने आधारभूत अस्पतालको संगठनात्मक संरचना र दरवन्दीको तेरिज तयार पारेको छ ।
स्वास्थ्य तथा जनसंख्या मन्त्रालयले असार २१ गते गरेको मन्त्रीस्तरीय निर्णय अनुसारको संरचना तयार गरी संघीय मामिला तथा सामान्य प्रशासन मन्त्रालयले स्थानीय तहलाई पत्राचार गरेको छ । स्वास्थ्य मन्त्रालयले असार २७ गते पठाएको पत्रका आधारमा सामान्य प्रशासन मन्त्रालयले पत्राचार गरेको हो ।
स्वास्थ्य मन्त्रालयले स्वीकृत गरिएको नमुना संगठनात्मक संरचना र दरवन्दी तेरिज स्थानीय तहलाई जानकारी गराइदिन भन्दै संघीय मामिला तथा सामान्य प्रशासन मन्त्रालयलाई पत्राचार गरेको थियो ।
स्थानीय तहमा सञ्चालन हुने ५, १० र १५ शैय्याका अस्पतालको आर्थिक दायित्व सम्बन्धित स्थानीय तहबाटै व्यवस्था गर्नुपर्ने स्वास्थ्य मन्त्रालयले भनेको छ । मन्त्रालयको निर्णय अनुसार आधारभूत अस्पतालहरु सञ्चालन भएका स्थानीय तहका सम्बन्धित वडामा सञ्चालित प्राथमिक स्वास्थ्य केन्द्र, स्वास्थ्य चौकी र आधारभूत स्वास्थ्य केन्द्रहरु सोही अस्पतालमा समाहित गर्नुपर्नेछ।
५ शैय्याको अस्पतालमा आठौँ तहको मेडिकल अधिकृतको नेतृत्वमा १८ कर्मचारीको दरबन्दी रहने प्रस्ताव गरिएको छ । एक मेडिकल अधिकृतसँगै ४ जना स्टाफ नर्स र ३ जना हेल्थ असिस्टेन्सको दरबन्दी राखिएको छ ।
१० शैय्याकोमा पनि ८औँ तहका मेडिकल अधिकृतको नेतृत्वमा २२ जना कर्मचारी रहने गरी दरवन्दी प्रस्ताव गरिएको छ । १० शैय्याको अस्पतालमा मेडिकल अधिकृतको २ दरबन्दी राखिएको छ । ५ स्टाफ नर्स र ३ जना हेल्थ असिस्टेन्स राख्न प्रस्ताव गरिएको छ ।
१५ शैय्याको अस्पतालमा भने ९औँ वा १० औँ तहको मेडिकल जनरलिस्टले नेतृत्व गर्ने गरी दरवन्दी प्रस्ताव गरिएको छ । यसपछि २ मेडिकल अधिकृत, ६ स्टाफ नर्स र ४ हेल्थ असिस्टेन्स रहने गरी दरबन्दी प्रस्ताव गरिएको छ ।
प्रस्तावित संगठनात्मक संरचना र दरबन्दीको पूरा विवरण
तपाईँको अभिमत