स्वास्थ्य बीमा प्रणाली लागू गरिए सरकारी अस्पतालका डाक्टर र नर्सको तलब राज्यले दिनु नपर्ने स्थिति हुनसक्छ : स्वास्थ्यमन्त्री पौडेल

राज्यले सरकारी अस्पतालका चिकित्सक, नर्स तथा स्वास्थ्यकर्मीको तलब राज्यले दिनु नपर्ने स्थिति सिर्जना गर्न सकिने स्वास्थ्य तथा जनसङ्ख्या मन्त्री प्रदिप पौडेलले बताउनुभयो । स्वास्थ्य बीमा प्रणाली लागू गरिए सरकारी अस्पतालमा काम गर्ने सबैको तलब अस्पताल आफैले दिन सक्ने स्थिति हुनसक्ने बताउनुभएको हो ।

आइतबार स्वास्थ्य बीमा सुधार सुझाव कार्यदलको पूर्ण प्रतिवेदन सार्वजनिक तथा सोको आधारमा बनाइएको कार्ययोजना सार्वजनिक गर्दै मन्त्री पौडेलले यस्तो बताउनुभएको हो ।

‘यो स्वास्थ्य बीमा प्रणाली लागू गरियो भने सरकारी अस्पतालमा डाक्टर, नर्स तथा स्वास्थ्यकर्मीहरूको वेतन पनि राज्यले दिनुपर्ने स्थिति नरहन सक्छ’, मन्त्री पौडेलले भन्नुभयो, ‘अस्पताल आफैले आम्दानी गर्ने स्थिति रहन सक्छ ।’ उपकरण र पूर्वाधार निर्माण गर्न पनि अस्पतालले आम्दानी गर्ने रकमबाट टेवा पुग्ने उहाँको भनाइ छ ।

उहाँले सबै नागरिकले समान ढङ्गबाट स्वास्थ्योपचार पाउने स्थिति सिर्जना हुने बताउनुभयो । ‘सबैले खल्तीबाट पैसा झिकेर होइन कार्ड झिकेर उपचार गर्ने अवस्था हुन्छ’, उहाँले भन्नुभयो, ‘पैसा नहुनेले उपचार नपाउने अवस्थाको अन्त्य हुन्छ ।’

मन्त्री पौडेलले स्वास्थ्य बीमालाई राष्ट्रिय सङ्कल्पका रूपमा लिएर जानुपर्ने पनि बताउनुभयो । उहाँले सबैलाई प्रणालीमा आवद्ध हुन पनि आग्रह गर्नुभयो ।  

स्वास्थ्य बीमामा देखिएका समस्या समाधानमा सुझाव दिन डा. शम्भुप्रसाद आचार्यको नेतृत्वमा गत असोजमा सुझाव समिति गठन भएको थियो । सो समितिले दिएको सुझावका आधारमा कार्ययोजना तयार गर्न अतिरिक्त सचिव डा. दिपेन्द्ररमण सिंहको नेतृत्वमा अर्को समिति गठन गरिएको थियो ।

सो समितिले निर्माण गरेको कार्ययोजना मन्त्री पौडेलले सार्वजनिक गर्नुभएको थियो ।