अमेरिकामा कोरोना उपचारमा खटिनुभएका नेपाली नर्सहरुकाे भोगाई
अहिलेको जस्तो बिरामीको चाप कहिल्यै देखेकी थिइनँ
चिन्ता नलिने, सास लामो लामो फेर्ने, सकारात्मक कुरामा ध्यान दिने र आत्मबल बढाउने
विश्वव्यापी महामारी बनेको कोरोना भाइरसले यतिबेला उपचारमा सलग्न चिकित्सक तथा नर्सहरुलाई धेरै जोखिम पनि तुल्याएको छ । हजारौं चिकित्सक तथा स्वास्थ्यकर्मीहरु बिरामीकाे सेवामै खटिएको अवस्थामा संक्रमणको शिकार हुनुकासाथै कतिले ज्यान समेत गुमाउनु परेकाे छ । एस्तो कठिन परिस्थितिमा घरपरिवारको समेत प्रवाह नगरी यतिबेला स्वास्थ्यकर्मीहरु अहोरात्र बिरामीको सेवामा तल्लिन हुनुहुन्छ । कोरोना भाइरस रोग अति प्रभावित अमेरिका तथा क्यानडामा नेपाली नर्सहरु पनि दैनिक रुपमा उपचारमा खटिनुभएको छ । अमेरिका तथा क्यानडामा लामो समयदेखि कार्यरत नेपाली नर्स जाे कोरोना भाइरसको उपचारमा पनि संलग्न हुनुहुन्छ, उहाँहरुको भोगाई जस्ताको तस्तै :
सुनिता बस्नेत, रजिस्टर्ड नर्स, टेक्सस अमेरिका
नर्सिङ पेशा सधै नै व्यस्त हुने पेशा हो । सधै बिरामीको सेवामा खटिनुपर्छ । अहिले भने पहिला भन्दा धेरै कठिन छ । कोरोनाभाइरसको महामारीले अस्पतालमा कोरोनाका बिरामीहरु आइरहेका हुन्छन् । जोखिमको बेला नै हामी खटिनुपर्छ । पेशा प्रतिको प्रतिवद्धता छँदैछ । कोरोना संक्रमण बढ्दै गएपछि अहिले अस्पतालमा स्रोत र साधनको समेत अभाव भएको छ । यस्तो बेला सुरक्षित भएर काम गर्न हामीलाई निकै कठिन छ । हामीले प्रयोग गर्ने सर्जिकल मास्क नै छैन । बिरामीको चाप दिनानुदिन बढ्दो छ, अवस्था जटील बनिरहेको छ । हामी जस्तोसुकै अप्ठ्यारोमा पनि काम गर्छो भनेर आएको हो । यही भएर यस्तो बेला नै हाम्रो आवश्यकता अस्पताल र बिरामीलाई हुन्छ । सर्ला भनेर भागेर हिँड्ने कुरा भएन, हामी त लड्ने हो । तर पनि बिरामीबाट सर्छ भन्ने जोखिम त छँदैछ । हाम्रो कारणले कतै परिवारलाई सर्ने हो कि भन्ने चिन्ता पनि अर्कोतिर छँदैछ ।
झण्डै २३ वर्षदेखि यही पेशामा छु, अहिलेको जस्तो बिरामीको चाप अस्पतालमा कहिल्यै देखेकी थिइनँ । काम गर्न गाह्राे छ, रोग कतिबेला सर्छ केही थाहा हुँदैन । बिरामीको चापले सरकारले भने जस्तो अस्पतालमा स्रोत र साधन पर्याप्त छैन । संक्रमणको भयले अहिले घरमा पनि परिवारसँगै दुरी कायम गरेर बसेका छौँ । घरमा म बेग्लै कोठामा बसेकी छु । दिनभर बिरामीसँग काम गर्दा फेरि घरमा परिवारसँग घुलमिल हुने अवस्था अहिले छैन । हामीले सजगता अपनाउनै पर्छ । नर्स हुनुको प्रतिवद्धता पूरा गरिएको छ, रोगसँग डराएको छैन । परिवारसँग दुरी कायम गदै अहिले बिरामीको सेवामा खटिएको छ । संघर्षदेखि विचलित छैन । हाम्रो कारणले परिवारलाई केही नहोस् भन्नेमा धेरै चिन्ता छ र सचेत पनि छौँ ।
मन्जु कार्की सिटौला, रजिस्टर्ड नर्स, अमेरिका भर्जिनिया
अहिले अस्पतालमा काम गर्ने डाक्टर, नर्स तथा प्राविधिक सबैलाई चुनौती छ । दिन प्रतिदिन कोरोनाको संक्रमण फैलिएर अस्पताल आउने बिरामी बढिरहेका छन् । यो अप्ठ्यारो अवस्थामा बिरामीलाई बचाउनु हाम्रो प्रमुख उद्देश्य रहेको हुन्छ । बिरामीलाई बचाउने क्रममा आफैलाई सुरक्षित राख्न मास्क, गाउन तथा गगल्स लगायतका दैनिक प्रयोग गर्ने बस्तुको अभाव छ । यही कारणले पनि बिरामीको सेवामा खटिने डाक्टर, नर्स र अस्पतालमा काम गर्ने सबैको जीवन जोखिममा छ । बिरामीको चापले घरबाटै मास्क बनाएर ल्याउन भनिएको छ । तर घरबाट बनाइएको मास्कले किटाणु नियन्त्रणमा खास सहयोग पुग्दैन ।
अहिले हालत दिनदिनै नाजुक बनिरहेको छ । आफू बच्नका लागि अस्पतालमा नर्स तथा डाक्टरले प्रयोग गर्ने सामान पर्याप्त छैन । विशेष गरी अस्पतालबाट घर फर्किदा समेत हामी सचेत हुनुपरेको छ । घरको मूलढोकाबाट नछिरि गराजबाट पस्छौँ । कपडा पनि त्यही गराजको कुनामा थन्काएर घरभित्र पस्ने गरेका छौँ । हामी आफै र परिवारलाई सजग गराएका छौँ । अस्पतालमा काम गर्ने हामीलाई सोसियल डिस्टेन्स संभव छैन । बिरामी सबैलाई छुनुपर्ने हुन्छ । डाक्टरले भन्दा नर्सले बढी बिरामीको हेरचाह गर्नु पर्छ ।
डाक्टरले चेकअप गरेर प्रिस्किप्सन लेखेपछि सकियो तर नर्सले बिरामीलाई हेरिरहनुपर्छ । नर्सलाई यतिबेला अलि बढी मुस्किल छ । हामीले यो बेलामा आफूले जानेको कोरोनाभाइरसको संक्रमणबाट बच्न अरुलाई सल्लाह पनि दिने गरेका छौँ । चिन्ता नलिने, सास लामो लामो फेर्ने, सकारात्मक कुरामा ध्यान दिने र आत्मबल बढाउने नै अहिलेको अवस्थामा यो संक्रमणबाट जोगिनु हो । अहिले सबैलाई कोरोनाको त्रास छ । अस्पतालमा चाप छ । ३० वर्षदेखि यही पेशामा छु र बिरामीकै सेवामा लागिरहेकी छु ।
राधा अर्याल, रजिस्टर्ड नर्स, क्यानडा
विश्वमा विकराल रुपमा फैलिएको कोरोना भाइरसले यतिबेला अस्पतालमा काम गर्ने हामी जस्ता नर्स तथा डाक्टरलाई कठिन अवस्था छ । अति नै रिस्क लिएर हामीले काम गर्नु परिरहेको छ । खतरा छ भनेर भागेर हिँड्ने कुरा पनि भएन । जस्तोसुकै परिस्थितिमा पनि काम गर्छाैँ भनेर हामी आएका हौँ । यही भएर अहिले कठिन अवस्था आयो भनेर पन्छिन मिल्दैन । चुनौतीसँग हामी डटेर सामना गरिरहेका छौँ र गर्न तयार छौँ । यसका लागि हामीमा आत्मबल पनि त्यतिकै चाहिन्छ । अहिले हामीलाई काम गर्न निकै मुस्किल छ । मुख्य कुरा अस्पतालमा हामीलाई चाहिने सामान नै छैन ।
हामीले अहिलेको अवस्थामा ज्यादै नै सावधानी अपनाउनु पर्ने हुन्छ । अहिले हामी १२ घण्टा पानी पनि नखाई बिरामीको सेवामा खटिएका छौँ । सबै बिर्सेर बिरामीको सेवामा नै हामी जुटेको अवस्था छ । मनोबल बढाएर यो अवस्थामा हामीले गरेका छौँ । दैनिक हामीले अस्पताल गएर यो कठिन घडीमा बिरामीको हेरचाह र सेवा गरिरहेका छौँ । अहिले अर्कोतिर हामी बिरामीको सेवामा लागिरहँदा परिवारमा डर छ । परिवारलाई हाम्रो डर र हाम्रो कतै हाम्रै कारण परिवारलाई यो संक्रमण सर्ने हो पनि भन्ने अर्को त्रास छ । अस्पतालमा यतिबेला बिरामीको चापले काम गर्न भ्याई नभ्याई छ । सबै जोखिमलाई हत्केलामा राखेर यतिबेला हामी बिरामीको सेवामा लागिपरेका छौँ । हामीले आफ्नो कर्तव्य निर्वाह गरिरहेका छौँ ।
डा. विष्णुमाया उपाध्याय, नर्स प्राक्टिसनर
अहिलेको अवस्थामा हरेकलाई कठिन छ । एकबाट अर्कोलाई कोरोना भाइरस संक्रमण हुने हो कि भन्ने त्रासदी पनि छ । यस्तो अवस्था झनै अहिले सबै भन्दा चुनौती चिकित्सा क्षेत्रमा काम गर्ने स्वास्थ्यकर्मीहरुलाई छ । यो बेलाको बिरामीको चाप बढ्ने भएका सबै स्वाथ्यकर्मीलाई फिल्डमा खटिनुपर्छ । बिरामीको सेवामा जुटिरहनुपर्छ । विदा भन्ने कुरा यस्तो बेला स्वास्थ्यकर्मीलाई हुँदैन ।
मैले पनि अहिले होसियारी अपनाएर काम गरिरहेकी छु । हाम्रो आफ्नै क्लिनिक पनि छ । बिरामीसँग केही दुरी कायम गरेर प्रिसकिप्सन लेख्नेदेखि औषधी दिने काम गदै आएको छु । अनलाइन मार्फत घरबाट पनि बिरामीलाई सल्लाह र सुझाव दिने काम गरिरहेको छु ।
अन्य बेला भन्दा यो बेला अहिले अवस्था जटील छ । कतै आफै पनि संक्रमणमा परिने हो भन्ने पनि छ । तर पनि हामी यसबाट भाग्ने अवस्था रहँदैन । विश्वव्यापी महामारी बनेको यो कोरोनाभाइरस अहिले अमेरिकामा तिव्र रुपमा फैलिएको छ । यो फैलावटसँगै अस्पतालमा काम गर्ने हामी जस्तो स्वास्थ्यकर्मीलाई भ्याइनभ्याई छ । बिरामीको चाप दिनानुदिन बढेर अस्पतालमा स्वास्थ्यकर्मीले प्रयोग गर्ने सामग्री समेत अभाव भइरहेको छ । अहिलेको अवस्थामा सबै भन्दा बढी जोखिम स्वास्थ्यकर्मीहरुलाई छ । तर पनि यो बेला सजग भएर हामीले आफ्नो भूमिका निर्वाह गनुपर्ने अवस्था छ र हामीले गरि पनि रहेका छौँ ।
इश्वरी बस्नेत, रजिस्टर्ड नर्स, क्यालिफोर्निया अमेरिका
मलाई लाग्छ अहिले सबैलाई संकट छ । कोरोना महामारीले फन्टलाइनमा काम गर्ने हामीलाई पनि मुस्किल नै छ । हामीले गाह्राे भए पनि देखाउनु भएन । हामी नै कमजोर भएर उपस्थित भयौ भने बिरामीले विश्वास गर्दैनन् । यो कोरोनाभाइरस लाग्ने बितिक्कै कसैको ज्यान जाँदैन । यसका लागि हामीले बिरामीको सेवा मात्र हैन हामीले मनोवैज्ञानिक तवरले पनि सपाेर्ट गर्ने काम गरेका छौँ । कोरानाले डर नै छैन भन्न खोजेको हैन । डर त हामीलाई पनि छ । जे जस्तो भए पनि मनोबल हामीले मात्र हैन सबैले यो बेलामा बढाउनैपर्छ । अहिले अस्पतालमा धेरै जसो स्वास्थकर्मी डराएको अवस्था पनि छ ।
अहिले अस्पतालमा जाँदा पनि कोही कसैसित बोलेको देखिँदैन । हाइ हेल्लो भन्न पनि छाडेको अवस्था छ । दुरदुर गरिहेका छन् । यो नै यो भय र त्रासको संकेत हो भन्ने मलाई लाग्छ । अहिले क्यालिफोर्निया पनि अमेरिकाको कोरोना संक्रमणको जोखिम राज्यमा पर्छ । अहिले यहाँ कोरोनाका बिरामी दिनदिनै आइरहेका छ्न अस्पतालमा । त्यस्तो बेला बिरामीसँग नजिक भएर काम गर्नुपरेको छ । यो अवस्थासँगै परिवारमा पनि हामीले मनोबल बढाउने र सचेतनाका कुराहरुलाई आदानप्रदान गर्ने काम पनि त्यतिकै गरिरहेका छौँ । यो कोरोना कसैलाई केही सिम्टम नदेखि पनि भएको देखिन्छ । यसैले अहिलेको अवस्थामा जतिसक्दो दूरी कायम गरेर घरमै बस्नु उपयुक्त छ । आफू पनि बच्ने र अरुलाई पनि बचाउने अहिलेको परिस्थितिमा यही नै उत्तम विकल्प हो ।
युएस नेपाल पोष्टमा प्रकाशित सामग्री
तपाईँको अभिमत